20121023 - 重陽登高 - 獨自上波波

上年重陽上沙田坳道，今年唔知去邊好，諗諗下，既然都三上大佛咯，咁冇理由上波波，只上得兩次架！加上醒起隻雀未去過林村同嘉道理，就咁話啦。

今日行林錦，之前果次太耐世紀了，會先去許願樹。

林村上嘉道理上次我行人路既，今次落馬路先知原來雙線，慢慢踩都冇謂

落黎講，可能上次係連抬帶推咁落，感覺 very 長，今次見冇車，起步就收死再慢慢放返 d 咁落，去到直升機場先要避車，轉兩三隻彎就到石崗喇，真係快好多，係條路爛囉。結果，一點晌屋企起步，兩點未夠就到林村，又影相又盛咁，到石崗，兩點九

今日原先想一腳一 check point

石崗上扶輪，用最近果隻上飛鵝山既策略…慢慢碌上去…用左九個字…三點半先到…

到扶輪買水買可樂食煙影相…抖左四個字先行…結果見到孖波，非但冇熱血上身捱上去，反而係落車影相…

齋砵打破，本來諗住轄出去，但又考慮個電話未必夠電，而且天色都唔靚…

去到嘆息之牆，d 46 打晒困籠，鬼咩，你唔讓我我唔讓你，後面又有車，梗死架，有條 benz 佬上山，頂死左，係咁叫落山 d 車退返上山等佢地上左山先，但…哩個世界有報應既

去到閘口，有個肥佬話佢隻狗晌山受左傷，想開車上去接佢，更亭叔叔又好人，真係開閘俾佢

一路行，都希望可以一腳上波波，但，真係力不從心…臨到環法位，為左避個細路而隊左去路邊石膊，不過係我衰，我為兜外圈上果隻左彎抽左出去而差 d 撞到個細路，咁，咪乘機抖下囉

之後晌環法路段又玩下全境，咪咪麼麼，成五點四個字先上到波波

去留精位想影個新東全境，哈，晌我個搵食位，竟然有條友晌度讀觀音經！嗌佢啦，唔應我喎！結果就晌佢身後影張全境…

行返上去波波時，都係 5 點半左右，d 涼意就已經黎喇，好彩我機警，帶定件九巴車長風褸，但 sir 到落閘口時對手仲係冰既

咸蛋黃同環法賽道都係落山先影，尤其隻蛋黃，本來想 zoom 近 d, 但一 zoom 就一劈野…搞極都搞喎到…我都係冇影相天份架

落到閘口仲多車過下晝，其中有一班疑似去拍戲，不過我冇深究

一路落，落到上次晌舊石影相果度，有兩個司機互Ｘ，其中一個，就係頭先上山時叫落山 d 人退車俾佢上山果條 benz 佬，哩次到佢落山，佢當撚然唔退車啦，而同佢頂死左上山果架車呢，已經將架車扭到貼晒路邊。我肉眼所見， benz 佬夠過既，但炆炆地，佢條友仔，一路扭一路攝一路講野唔知講咩啦，搞到貼晒路邊果架車個司機忍唔住伸Ｘ佢 : 我都讓晒路俾你啦，你驚 high 花架車就咪渣 benz 啦Ｘ你ＸＸ，嗌我落山俾你落先，你ＸＸ大Ｘ晒咩，我肯落我後面 d 車都唔肯啦Ｘ樣

結果，benz 佬過到喇，但接住仲有六七架車上梗山……

我當然亦唔留底睇戲，先行一步啦

落到扶輪，本來想落石崗然後林錦走，但天色已晚，未行過，唔敢行…結果又係落荃灣

落到荃灣其實都係六點半左右，但非常肚餓，要食飯！

一路食飯一路諗，點返屋企好呢，最後當然決定踩返去啦

去到紅 a , 之前都係行人路，今次馬路喇，又唔係想像中咁凶險…

去到華景影完相要落斜，就真係淆喇，d 車快Ｘ到呀……

去到車房對面，已經要好留心 d 車既我…突然聽到好近距離有狗吠，我 dllm 咩，本來溜緊車，又要加腳爆佢老母！

到轉呈祥道同落蝴蝶谷個分岔口，因為係有條村晌上面，所以果度有紅綠燈，仲要有行人燈添，所以，係可以好放心靠左，停車，過行人燈行去落蝴蝶谷條路

當然我唔係落蝴蝶谷，係去呈祥道條行人路，哩條行人路同龍翔道果條差唔多，好過龍翔道果條既係，龍祥道果條有渠蓋…哩條係冇的！所以我好鍾意行哩條行人路，而今日仲撞到一個師兄由明愛果邊上…佢係醫生…晌明愛岩岩收工返大圍屋企！不過我冇咩力，踩冇幾步我叫佢自己行先…

最後，晌過左孖橋返馬鞍山段路，我行緊 17~8 唧，因為好大風…突然晌我右手，有條白衣身影，我擰頭望啦，原來係一 pair 友，條女想超我車，咁你咪超飽佢囉，阿叔我真係冇力，但佢係都唔過我喎，直到佢條仔叫佢"踩快兩步啦，佢先過

點知佢地過左我之後，竟然就咁晌我前面女既行前，男既就晌我前面，蝦條丫，我仲以為你有幾快，不過仲好，有人同我頂風

直到右轉上大水坑果條斜路仔之前，條女凸然擰轉頭便秘咁既樣，梗係啦阿姐，幾大風先得架，於是條仔就嗌：我行前啦，咁就過左條女，我，就繼續跟住條女，點知條仔超左車之後，完全唔理條女自己踩自己，雖然都唔係快，但一路甩緊條女果隻，於是條女繼續頂風，我繼續食風尾，直至去到天宇海，依？冇咩風喇喎，咁我就抽車，長揚而去了……

20120324 - 三臨海下之灣仔一遊

對上一次紀錄是０１０２，但其實上星期日小弟已全面復出，先由家出發經大埔道青公到荃灣，跟友人集合後齊上油柑頭引水道落汀九再走青公入元朗，友人在雲鵬改車的改車購物的購物後，再由元朗經新田粉嶺大埔回家。由於路線都是舊路線加上沒有特別的留影，所以沒有郊遊報告了。

今次不設地圖，如其他用 『家明五百』的友人上載了他們的GPS 紀錄的話，我才相借放在這裡吧。

天氣預報有寒風冷鋒於週末進襲，加上星期五晚要去參與足球比賽，本身絕無打算星期六要一早出車，但友人殷先生一句『你去我去』，我選擇回應一句『聽朝放飛機就正契弟』！不打算做契弟的我，縱使比賽過後百般力疲，都仍在０８００起床，０８２０就在家附近的老麥早餐了。

老麥的扭扭粉早餐是有水平的

大顆兒約好１０００於大網仔路西沙路交界的迴旋處（我稱為北潭迴旋處），香港及九龍東的代表（各２人共４人）於０９００在彩雲出發，新界東３人（兩位騎ＲＢ的友人連我）則定了０９００在馬鞍山海濱長廊尾集合，時間其實預早了很多，因為兩位ＲＢ友人說未走過西沙路要我帶路，而我怕自己狀態過於低迷拖慢了行程。結果，０９４０已到了集合地點了，而且兩位友人還等了我一會兒，如果只有他們兩人，半小時內到著絕無問題。

等待香港及九龍東代表中

在等待香港及九龍東代表的時間，才知道原來其中一位友人的傘兵車出了點問題，結果搞了半小時多才出發，就這樣，我們新東三子，等了又等，到大概１０２０左右，我決定先帶兩位友人到第一個景點－ 旱禾坑 碼頭影相留念。

咁樣影係影哩個碼頭既特色

可惜天色仍不美，但天氣就真係冇得頂

就在新東三子留影期間，其他４人亦相繼到著，於是大顆兒浩浩蕩蕩的向下一個景點進發，抗戰烈士紀念碑。

我終於都來了

隻雀代我鞠躬

之後就直入北潭涌了，包大尾的我確實有點不好意思，但真的力有不逮，無辦法。稱事休息再直闖第一關北潭凹，友人問我要走多久，我還隨便說只走１ＫＭ 呢......單單由閘口到麥理浩夫人渡假區就是只有１ＫＭ左右，但由麥理浩夫人渡假區到北潭凹就有１．６ＫＭ左右了，結果到了北潭凹，便被友人們不停破口大罵呢。

又稍事休息後，向另一個景點－黃石碼頭進發，由於有３名車友轉踩ＭＴＢ（１架硬架２架傘兵），在黃石碼頭時除了影相留念，最主要活動就是試車了。

影相及試車完畢，就是直闖海下之時。途經大灘之時大家都不自禁停車影相，後來我想想，原來，我從未影過這段路，實在可惜。

這是新東ＲＢ友人捕捉到有要求的黎先生而進行的連拍

在海下村好景士多食午餐，然後就到渡頭影相去。值得一提，好景士多的公仔麵不食也罷，但炒粉麵飯也許可以試，因為，黎先生及殷先生食的楊州炒飯，竟然用美極炒的，很香呀！另外，新東ＲＢ二人組及港島區傘兵代表亦決定飯後先行離開了

有水平的美極楊州炒飯

海下的渡頭，每一次來到，都覺我心曠神怡，而有要求的黎先生及殷先生，則有要求地到石灘拍照，而跟隨我們的九龍東傘兵友人朱先生，在這時間仍是相當歡愉的跟隨著我們的。

可以的話我真的很想在這裡坐半天，靜靜的放鬆自己

離開渡頭，終於要到一直沒有到過的地方－灣仔一遊了，事緣黎先生轉踩ＭＴＢ並申請了越野單車徑許可證，就跟已領證的朱先生說好要到海下的越野單車徑一遊，我早已決定冒險挺進，只是想不到殷先生騎著ＲＢ亦捨＿陪君子！由渡頭爬樓梯回到小徑往左走沒多久，就到了『賽馬會匯豐世界（香港）自然基金會海下灣海洋生物中心』，是甚麼東西？誰知道，反正都不能進內。

由渡頭來到這裡都是石屎小徑，換句說話，越野單車徑還未開始．．．但當開始了之後，我有理由懷疑，這段越野單車徑是給高階的車手玩的，因為，不是亂石滿地，就是不斷的石級，結果除了努力以踩車完成的黎先生外，我跟殷先生及朱先生都是抬／推完成的（黎先生的努力踩，其實都是踩兩步，抬／推十幾步之下完成的）

不是亂石滿地，就是不斷的石級 

下面，就是灣仔了，不是香港島的灣仔啊！

經過約半小時的折騰，終於，都到了目的地，西貢西郊野公園！ 

海下到灣仔１又４份１公里

整個西貢西郊野公園灣仔擴建部份區域都可供越野單車使用，當日我們當然沒有錯過啦

地下的箭咀有夠溫馨

這段越野單車徑看來也是輕鬆應付的，所以黎先生、我、朱先生三人便不顧一切的闖進去！騎ＲＢ的殷先生本來不打算加入，但，姣婆焉能守寡！

鳴謝朱先生出色的拍攝，我已用來做ＦＢ的大頭照咯

但好景不常，上圖上的理想路段並不長，我想走了幾百米左右吧，就會到了一個大草地，之後再直去的話又是上石級的路段，黎先生及殷先生探路過後認為不太理想，我們亦決家調頭回去了。

大草地

回到起點後，我其實有提議走另一邊的路看看，但大家看下圖，都知道我爭取失敗了。

兩個叔叔（不行了）

那麼辛苦走到這裡來，不可以白白離開的，於是，我再提議到海邊走走，起初，黎先生又提出反對，就像當日龍蝦灣時一樣，但，我並沒有放棄！

次次是日主菜都係無心插柳的

話唔去的黎先生結果一馬當先視察場地

浮誇的他化身成為紅衛兵

我亦不甘示弱來個例POSE

左面的大石就是我們取景之地

右面石灘太險峻, 徒步行過去亦有困難

經過一輪花式留影之後，就打道回府，當然又要很悲痛的沿路連抬帶推的走回去。返回海下村，朱先生先行宣佈崩潰要坐車回去，殷先生要到佐敦谷一帶的娘家，所以跟黎先生同行，我其實都要崩潰了，但又不想坐車回去，就跟兩位友人說好不要等我，各自回去吧。那時大約是３時左右，但我回到北潭迴旋處已經要４時半，拖著疲乏的身軀回到馬鞍山的家，差不多是６時了，除了灣仔一段令人崩潰外，主要都是歇冬期過後體能嚴重下滑所致。還跟友人說好在復活節時到大山，希望還有兩星期時間，盡量提昇自己的體能吧。

20120102 - 區內閒遊

02
在較大的地圖上查看20120102 - 區內慢碌

對上一次 POST 文是11月20 日的遊蹤，但實情是在 12 月中旬，我是有跟友人到元朗大棠一遊， 不過當日電話沒電，沒有拍下任何照片，加上行程頗為鬆散，所以放棄紀錄。只要新春假期不太冷的話，我會再到那裡拍紅葉，到時再紀錄。

不過，當日出車之時，其實我已歇冬接近三星期，太凍嘛。結果不單止人的體能退步，就連車，久未開動，一開動，就五勞七傷了－前餅左邊曲餅鬆脫，線管更因過度磨損而斷掉（因為我經常開、摺我的灰雀）。當然要送往車鋪維修，但反正敵不過寒冬，乾脆過了聖誕才處理，元旦日才領回家，又半個月沒有騎車。

本來因放棄周中操練而體能退步的我，經歷這個歇冬期後，體能上基本上退步至近乎一年前，同樣是歇冬復出之時，唉。

今天本打算早起再想想到那裡，結果 12 時才起床，食飽午飯都已 2 時多，懶得往外面走，索性區內短遊熱一熱身。

先由家裡出發到水泉澳，在多石街時那種力不從心，比之前被友人殷先生擊潰時更甚，沒有正式計時，但我想，我應該要用到 12 至 13 分鐘才到頂。有夠丟人現眼。

本身計劃是先到水泉澳，去大圍上大埔道，過了徑口路後上橋迴轉回大圍，經美林村往火炭上穗禾路，後接麗坪路再到優景里過創新路回家。但過了美林村準備到沙田火車站時，看見道風山路路口，才驚醒自己遷入沙田二十載，也未曾踏足這地方。於是，新增行程了。

道風山路直上至道風山基督教叢林，全長約1.4 km，攀爬約 120m，換轉早兩個月前，我應該可以輕鬆應付，但今時今日，我竟然花了 14 分鐘！欲哭無淚！這段路有幾點要注意：第一，單線雙程，有對頭車的；第二，以路程計算是頗多彎的，上斜時內彎位亦較陡峭；第三，路況不如理想，雖然不至太差，但凹凸不平，而且有很多修補痕跡，下坡時車速不太快問題都不大的。

由於路況不算理想，所以在下山的時候，到了道風山路中段，就右拐百樂徑下山去。這條百樂徑因為是多個屋苑的主要通道，所以路面保養完善得多，下坡時亦安心得多。可能因為假期關係，車輛亦較少。過了銅鑼灣山路路口右拐可接上美田路直下至美林村再轉會大埔公路。

雖然加插了這段新環節，但無損我今日要再上穗禾麗坪雙路的決心。先從由大圍經新城市廣場巴士站、瀝源、禾輋轉入火炭路再上穗禾路，到達獅子亭時已差不多 5 時半，尤辛太陽還未下山，所以下坡時，照面打來的風還不算太凍。

穗禾路到大學，必須到樂信徑，再往駿景路接大埔公路。而到樂信徑，可以從穗禾路直去桂地街，轉松頭下路，再接樂林路轉入樂信徑，但這樣走非常轉折且不斷要上下坡。簡單的路線是穗禾路轉回火炭路，到火車站旁的單車徑直上樂景街就輕鬆到達樂信徑，今天我就是這樣走。

在到達中文大學崇基學院入口前，就是麗坪路路口，對上一次來這裡時，是 8月14 日的炎炎夏日，那時候我仍是踩著 dahon mu，這亦是今天必須要到麗坪路的原因－我這部灰雀未到過這裡嘛。

說實在，這條路路況其實絕不理想的，尤其下山的右線，一支燈柱就有一雙渠蓋的設計實在匪夷所思。可幸，經過深屈道、龍坪路、觀坪路的洗禮（排名以爛路程度分先後，前者最輕微），麗坪路今時今日在我心目中絕對是路況理想的道路了。只是自己不爭氣，爬上去是以不是氣喘如牛可以形容的了，總算未有落腳。拍了紀念照後下山，方是最痛苦時刻，時至入黑，加上費了九牛二虎之力才到山頂的我，汗流浹背的時間頂著刺骨寒風，下坡時不是叫『救命』就是在問候不知誰人的母親。那份煎熬，絕對打消我本來想保持每周兩天水泉澳的念頭。還是等天氣回暖再算吧。

今次不在文中加插相片了，因為主要的相片都是道風山基督教叢林內的風景相，下面一次過放。